साहेल

साहेल हा आफ्रिका खंडामधील सहारा वाळवंटाला दक्षिणेकडील भूभागापासून वेगळे करणारा एक नैसर्गिक व भौगोलिक प्रदेश आहे. साहेल पट्टा सुमारे ५४०० किमी लांब व १००० किमी रुंदीचा असून तो आफ्रिकेच्या उत्तर भागात लाल समुद्रापासून अटलांटिक महासागरापर्यंत धावतो.

साहेल पट्टा गांबिया, सेनेगाल, मॉरिटानिया, माली, बर्किना फासो, अल्जिरिया, नायजर, नायजेरिया, चाड, कामेरून, सुदान, दक्षिण सुदान व इरिट्रिया ह्या आफ्रिकन देशांमधील काही अथवा पूर्ण भूभाग व्यापतो. ह्या पट्ट्यामध्ये हिरवळ व झाडे आढळतात. तसेच येथे अनेक दुर्मिळ पक्षी व प्राणी देखील वास्तव्य करतात.