वसंत जोशी

डॉ. वसंत स. जोशी (१९३० - १६ नोव्हेंबर, २०१७) हे प्राचीन मराठी साहित्याचे अभ्यासक आणि संशोधक होते.^[१]

यांचे कुटुंब मूळचे कर्नाटकातील चिक्कोडी तालुक्यातील अक्कोळ गावाचे आहे. जोशी यांचे शालेय आणि महाविद्यालयीन शिक्षण निपाणी, कोल्हापूर व पुणे येथे झाले.^{[ संदर्भ हवा ]} सन १९६८मध्ये एकनाथकृत भावार्थ रामायणाचा विवेचक अभ्यास या विषयावर त्यांना मिळालेली पीएच.डी. पदवी ही शिवाजी विद्यापीठाच्या मराठी विभागातील पहिली होती. १९६१ ते १९६५पर्यंत ते अर्जुननगरच्या देवचंद महाविद्यालयात व १९९० झालेल्या सेवानिवृत्तीपर्यंत वाईच्या किसनवीर महाविद्यालय येथे पदव्युत्तर विभागाचे प्रमुख होते.^{[ संदर्भ हवा ]}

आपल्या कारकिर्दीच्या सुरुवातीस जोशी हे दैनिक सत्यवादीत उपसंपादक होते. त्यांनी ना.सी. फडके यांचे लेखनिक म्हणूनही काम केले. प्राचीन मराठी साहित्याचे संपादन व संशोधन यात त्यांनी काम केले. महानुभव आणि संत वाङमयावर त्यांनी विपुल लेखन केले. महानुभव संत, ज्ञानदेव चिंतन, मराठी गौळण, संशोधन साधना, मराठी भाषा व साहित्य संशोधन खंड १ व २ आदी किमान १० संशोधनात्मक पुस्तकांचे लेखन व संपादन त्यांनी केले.^{[ संदर्भ हवा ]} त्यांच्या ग्रंथांना मराठी अभ्यासकांनी गौरविले व विविध पुरस्कारही मिळाले. पंजाब आणि हैद्राबादमधील मराठी हस्तलिखिताची त्यांनी संपादलेली सूची ही मौलिक संदर्भ साधन म्हणून मान्यताप्राप्त आहे.^{[ संदर्भ हवा ]}

डॉ. जोशी यांनी महाराष्ट्र साहित्य परिषदेच्या कार्यकारी मंडळाचे सदस्य व कार्यवाह म्हणून आणि महाराष्ट्र साहित्य पत्रिकेचे संपादक म्हणून १९८५ ते १९८८ पर्यंत काम केले.^{[ संदर्भ हवा ]}

ते पुण्याच्या भारत इतिहास संशोधन मंडळाचे कार्यकारिणी सदस्य होते व १९७४ ते १९७७ या काळात त्या मंडळाच्या त्रैमासिकाचे संपादक होते.^{[ संदर्भ हवा ]}

नवभारत या वाईहून प्रसिद्ध होणाऱ्या वैचारिक मासिकाच्या संपादक मंडळातही त्यांनी काम केले होते.^{[ संदर्भ हवा ]}

• एकनाथकालीन मराठी वाङ्मय (सहलेखक - डॉ. हे.वि. इनामदार)
• काही वाङ्मयप्रकार : शोध आणि स्वरूप
• मद्रासची मराठी हस्तलिखिते
• मराठी गौळण
• मराठीतील बारामास काव्ये
• मराठी भाषा व साहित्य संशोधन (खंड १, २ आणि ३) (सहलेखक - म.ना. अदवंत)
• मुक्तेश्वर भावार्थरामायाण
• संशोधन साधना