बाईपण भारी देवा

बाईपण भारी देवा हा २०२३ मधील केदार शिंदे दिग्दर्शित भारतीय मराठी-भाषेतील नाटक चित्रपट आहे.^[३] चित्रपटाची निर्मिती जिओ स्टुडियोझ आणि एमव्हीबी मीडियाद्वारे करण्यात आली असून यात रोहिणी हट्टंगडी, वंदना गुप्ते, सुकन्या मोने, दीपा परब, सुचित्रा बांदेकर आणि शिल्पा नवलकर यांच्या प्रमुख भूमिका आहेत.^[४]

शीर्षक गीत ‘बाईपण भारी देवा’च्या चित्रीकरणापर्यंत या चित्रपटाचे नाव ‘मंगळागौर ’ असे होते. सहनिर्माते अजित भुरे यांनी केदार शिंदेंना चित्रपटाचे शीर्षक बदलून बाईपण भारी देवा असे सुचवले. ^[५]

चित्रपटाने तिकीट खिडकीवर ५० दिवसांमध्ये ₹९०.५० कोटींहून अधिक कमाई केली.^{[६][७][८]} हा आतापर्यंतचा दुसरा सर्वाधिक कमाई करणारा मराठी चित्रपट ठरला.^[९] हा चित्रपट पहिल्या आठवड्यात सर्वाधिक कमाई करणारा मराठी चित्रपट^[१०] आणि २०२३ मधील सर्वाधिक कमाई करणारा मराठी चित्रपट म्हणून उदयास आला. याने मराठी चित्रपट उद्योगासाठी एका दिवसात ₹६.१० कोटींपेक्षा जास्त कमाईचा नवा विक्रम देखील रचला.^[११] हा २०२३ मधील सर्वाधिक कमाई करणारा महिला केंद्रित चित्रपट आहे.^[१२]

बाईपण भारी देवा हा समीक्षणात्मक तसेच व्यावसायिकदृष्ट्या यशस्वी चित्रपट ठरला. चित्रपटाचे लेखन, कथा, संगीत आणि दिग्दर्शनासाठी प्रशंसा केली गेली आहे. बाईपण भारी देवा हा "ब्लॉकबस्टर" चित्रपट ठरला.^{[१२][१०]}

हा चित्रपट सर्व प्रथम २८ मे २०२१ ला प्रदर्शित होणार होता.^[१३] त्यानंतर तो २८ जानेवारी २०२२ पर्यंत पुढे ढकलण्यात आला.^[१४] पुढे ६ जानेवारी २०२३ रोजी प्रदर्शित तारीख ठरवण्यात आली.^[१५] परंतु शेवटी ३० जून २०२३ ला चित्रपट प्रदर्शित झाला.^[१६]

हा चित्रपट अशा सहा बहिणींची कथा आहे ज्या काही कारणास्तव एकमेकांपासून विभक्त होतात आणि कौटुंबिक, वैयक्तिक आणि आर्थिक समस्यांनाही तोंड देतात. ^[१७]

• रोहिणी हट्टंगडी
• वंदना गुप्ते
• दीपा परब
• सुकन्या कुलकर्णी
• सुचित्रा बांदेकर
• सुरुची अडारकर
• शिल्पा नवलकर
• सोहम बांदेकर
• साक्षी परांजपे
• वरद चव्हाण
• तुषार दळवी
• शरद पोंक्षे
• पीयूष रानडे
• स्वप्नील राजशेखर

जिओ स्टुडिओने आंतरराष्ट्रीय महिला दिन २०२२ रोजी चित्रपटाची घोषणा केली. ^[१८] EmVeeBee मीडियाच्या माधुरी भोसले यांनी बेला शिंदे आणि अजित भुरे यांच्यासह चित्रपटाची निर्मिती केली आहे . ^{[१९] [२०]}

चित्रपटाची कथा सहा बहिणींवर महिला केंद्रीत असून अभिनेत्री रोहिणी हट्टंगडी, ^[२१] वंदना गुप्ते, सुकन्या मोने, सुचित्रा बांदेकर, दीपा चौधरी, शिल्पा नवलकर ^[२२] प्रमुख भूमिकेत आहेत. ^[२३]

भारतात कोरोना टाळेबंदीपूर्वी मुख्य छायाचित्रण सुरू करण्यात आले होते, परंतु महाराष्ट्रात कोविड-१९ साथीच्या आजारामुळे चित्रीकरण थांबवण्यात आले होते. केदार शिंदे यांच्या म्हणण्यानुसार, टाळेबंदीपूर्वी चित्रपटाचे ८० टक्के चित्रीकरण पूर्ण झाले होते. ^[२४] टाळेबंदीनंतर उत्तर-निर्मितीचे (पोस्ट-प्रॉडक्शन) काम पूर्ण झाले. ^[२५]

चित्रपटाचे संगीत आणि पार्श्वसंगीत साई-पीयूष यांनी दिले आहे आणि संगीताचे पुनर्मुद्रण स्वरूप जोशी यांनी केले आहे. अदिती द्रविड आणि वलय मुलगुंद यांची अतिरिक्त गाणी व बोल आहेत, तर सावनी रवींद्र आणि मानसी हेडऊ यांनी गायन केले आहे.

८ मार्च २०२३ रोजी, आंतरराष्ट्रीय महिला दिनानिमित्त क्रिकेट खेळाडू सचिन तेंडुलकरने त्याच्या सोशल मीडिया अकाउंटवर जाऊन चित्रपटाचे पोस्टर शेअर केले. ^[२६] २८ एप्रिल २०२३ रोजी चित्रपटाचा टीझर प्रदर्शित झाला ^[२७] यानंतर ६ जून २०२३ रोजी मुंबईतील महालक्ष्मी मंदिराला भेट देणाऱ्या टीमसोबत शीर्षक गीत सादर करण्यात आले. ^[२८] चित्रपटाचा अधिकृत ट्रेलर १३ जून २०२३ रोजी स्वातंत्र्यवीर सावरकर सभागृहात संपूर्ण टीम आणि ज्येष्ठ अभिनेते अशोक सराफ यांच्या उपस्थितीत सादर करण्यात आला. ^[२९] हा चित्रपट ३० जून २०२३ रोजी चित्रपटगृहात प्रदर्शित झाला.